Jai Odisha
News

ନିଶାମୁକ୍ତ ଓଡ଼ିଶା ଗଠନ ପାଇଁ ଆହ୍ୱାନ ଦେଲେ ରାଷ୍ଟ୍ରପତି

ମୟୂରଭଞ୍ଜ,୪ା୫:   ଆଜିଠାରୁ ୩ଦିନିଆ ଓଡ଼ିଶା ଗସ୍ତରେ ଆସିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସେ ମୟୂରଭଞ୍ଜ ଜିଲ୍ଲାର ବାଦାମପାହାଡରେ ପହଞ୍ଚିବା ପରେ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା। ରାଷ୍ଟ୍ରପତି ସାତପଉଟିଆ ସ୍ଥିତ ବ୍ରହ୍ମକୁମାରୀ କେନ୍ଦ୍ରର ନିଶାମୁକ୍ତ ଅଭିଯାନର ଶୁଭାରମ୍ଭ କରିଛନ୍ତି। ଏହି ଅବସରରେ ସେ ନିଶାମୁକ୍ତ ଓଡ଼ିଶା ଗଠନ ପାଇଁ ଆହ୍ୱାନ ଦେଇଛନ୍ତି। ସେ କହିଛନ୍ତି ନିଶାପାନ ଜଣେ ବ୍ୟକ୍ତି ପାଇଁ ଅଭିଶାପ। ଅର୍ଦ୍ଧଚେତନ ବ୍ୟକ୍ତି କେବେହେଲେ ଠିକ୍‍ ନିଷ୍ପତ୍ତି ନେଇପାରିବ ନାହିଁ । ନିଶା ଯୁବ ପୀଢ଼ିଙ୍କୁ ପଥଭ୍ରଷ୍ଟ କରୁଛି। ଏଥିପାଇଁ ସଚେତନତାର ଆବଶ୍ୟକତା ରହିଛି। ସେ କହିଛନ୍ତି କୌଣସି ବ୍ୟକ୍ତିଙ୍କୁ ଏଭଳି ଅଭ୍ୟାସ ଆପଣେଇବା ଆବଶ୍ୟକ, ଯାହାଦ୍ୱାରା ସେମାନଙ୍କ ପଥ ପୁଷ୍ପିତ ହେବ। କ୍ରୋଧ କାମନା ମଧ୍ୟ ନିଶା ସଦୃଶ । ଏହିଗୁଡ଼ିକ ଠାରୁ ଦୂରେଇ ଯିବାକୁ ହେବ। ନିଜକୁ ସୁଧାରିଲେ ସଂସାର ପରିବର୍ତ୍ତନ ହେବ ଏବଂ ଏଥିପାଇଁ ଜଣେ ବ୍ୟକ୍ତିକୁ ନିଜକୁ ନିଜେ ସହଯୋଗ କରିବାକୁ ହେବ। ରାଷ୍ଟ୍ରପତି କହିଛନ୍ତି କେନ୍ଦ୍ର ସରକାର ମଧ୍ୟ ନିଶାମୁକ୍ତ ଦେଶ ଗଠନ କରିବାକୁ ଅନେକ ପ୍ରୟାସ କରୁଛନ୍ତି।ଏହି କାର୍ଯ୍ୟକ୍ରମରେ ଯୋଗଦେଇ ରାଜ୍ୟପାଳ ପ୍ରଫେସର ଗଣେଶୀଲାଲ କହିଛନ୍ତି ନିଶା ଅନେକଙ୍କ ଜୀବନ ନଷ୍ଟ କରିଛି। ସୁସ୍ଥସମାଜ ଗଠନ କରିବାକୁ ହେଲେ ପ୍ରଥମେ ନିଶାମୁକ୍ତ ସମାଜ ଗଠନ କରିବାକୁ ହେବ। ସେ କହିଛନ୍ତି କରୁଣା ମାଧ୍ୟମରେ ହିଁ ନିଶାମୁକ୍ତ ଅଭିଯାନ ସଫଳ ହୋଇପାରିବ। ଏହାପୂର୍ବରୁ ରାଷ୍ଟ୍ରପତି ନିଜ ଗାଁ ପାହାଡପୁରଠାରେ ବିଭିନ୍ନ ପ୍ରକଳ୍ପର ଉଦ୍‍ଘାଟନ କରିଛନ୍ତି। ସେ ଦକ୍ଷତା କେନ୍ଦ୍ରର ଶିଳାନ୍ୟାସ କରିବା ସହ ଏସ୍‍.ଏଲ୍‍.ଏସ୍‍ ସ୍କାରକୀ ଆବାସିକ ବିଦ୍ୟାଳୟର ଗୋଷ୍ଠୀ କେନ୍ଦ୍ରର ଭିତ୍ତିପ୍ରସ୍ତର ସ୍ଥାପନ ଜୀବନଜୀବିକା କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି।ତେବେ ରାଇରଙ୍ଗପୁରରେ ସଂବର୍ଦ୍ଧନା ସଭାରେ ମହାମହିମ୍‌ ଭାବବିହ୍ୱଳ ହୋଇ ପଡ଼ିଥିବା ଦେଖିବାକୁ ମିଳିଛି । ସେ କହିଛନ୍ତି, ‘ସମୟ ବଡ଼ ବଳବାନ, ଯାହା ପାଇଛି, ତାହା ଆପଣମାନଙ୍କ ପାଇଁ । ଉପରବେଡାରେ ଜନ୍ମ ହୋଇଥିଲେ ବି ରାଇରଙ୍ଗପୁରରେ ଦ୍ୱିତୀୟ ଜନ୍ମ । ବାପା ମାଆ ସେତେ ପାଠ ପଢ଼ି ନଥିଲେ ବି ପାଠର  ଗୁରୁତ୍ୱ  ବୁଝିଥିଲେ । ସେଥିପାଇଁ ବାପା ମାଆ ମୋତେ ପାଠ ପଢ଼ାଇଲେ, ଚାକିରି କଲି । ପରବର୍ତ୍ତୀ ପର୍ଯ୍ୟାୟରେ ଚାକିରି ଛାଡ଼ି ଅନରାରୀ ଶିକ୍ଷକତା କଲି । ଏହାପରେ କାଉନସିଲର ଓ ପରେ ପରେ ଭାଇସ ଚେୟାରମ୍ୟାନ ହେଲି । ୩ ବର୍ଷ ପୂରି ନ ଥିଲା ଆପଣମାନେ ମୋତେ ବିଧାନସଭା ପଠାଇଲେ । ଏ ମାଟି ପାଖରେ ମୁଁ ଚିର ଋଣୀ, ସେ ଋଣ ଶୁଝିବାକୁ ମୁଁ ଚେଷ୍ଟା କରୁଛି । ଆଜି ମୁଁ ଯାହା ହୋଇଛି, ସବୁ ଏଇ ମାଟି ପାଇଁ । ଏ ମାଟିର ଋଣ ମୋ ଉପରେ ମଲ୍ଟିପ୍ଲାଏ ହୋଇଚାଲିଛି । ଏ ମାଟିର ଋଣ ଶୁଝିବାକୁ ମୋତେ କେତେ ଜନ୍ମ ଯେ ଲାଗିବ, ଜାଣିନି । ଏ ମାଟିର ନାଁ କେତେ ରଖିବି ଜାଣିନି, କିନ୍ତୁ କେବେ ବଦନାମ କରିବିନି । ’ଆସନ୍ତାକାଲି ରାଷ୍ଟ୍ରପତି ପଣ୍ଡିତ ରଘୁନାଥ ମୁର୍ମୁଙ୍କ ସମାଧୀ ସ୍ଥଳରେ ଶ୍ରଦ୍ଧାଞ୍ଜଳି ଜ୍ଞାପନ କରିବେ। ଏହାପରେ ରାଷ୍ଟ୍ରପତି ଶିମିଳିପାଳ ଅଭୟାରଣ୍ୟ ପରିଦର୍ଶନ କରିବାର କାର୍ଯ୍ୟସୂଚୀ ରହିଛି। ରାଷ୍ଟ୍ରପତି ଆସନ୍ତା ଶନିବାର ପୂର୍ବାହ୍ନରେ ବାରିପଦାସ୍ଥିତ ମହାରାଜା ଶ୍ରୀରାମଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟରେ ଦ୍ୱାଦଶ ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେବେ ବୋଲି ଜଣାପଡ଼ିଛି। ସେହିଦିନ ଅପରାହ୍ଣରେ ରାଷ୍ଟ୍ରପତି ନୂଆଦିଲ୍ଲୀ ପ୍ରତ୍ୟାବର୍ତ୍ତନ କରିବେ। ରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି। ରାଷ୍ଟ୍ରପତି ପଦରେ ଅଧିଷ୍ଠିତ ହେବା ପରେ ପ୍ରଥମଥର ପାଇଁ ସେ ନିଜ ଜନ୍ମମାଟି ମୟୁରଭଞ୍ଜ ଗସ୍ତ କରୁଛନ୍ତି

Leave A Reply

Your email address will not be published.